Festa e Maturantëve të qarkut të Tiranës

Drejtoria Arsimore e qarkut Tiranë organizoi festën e maturës 2014 në ambjentet e shkollës së mesme “Sadik Stavileci” Katundi i Ri. Në këtë aktivitet morën pjesë Ministria e Arsimit dhe Sporteve znj.Lindita Nikolla, kryetari i komunës Kashar z. Besnik Fuçia, mësues e drejtues të institucioneve arsimore të qarkut Tiranë, si dhe maturantët me rezultate më të mira të shkollave të mesme të gjithë qarkut.

Në fjalën e saj përshëndetëse Drejtorja e Drejtorisë Arsimore znj. Eglantina Metani, i uroi maturantët për rezultatet e arritura dhe tha se ata janë modelet që duhet të kultivohen edhe më fort në të ardhmen.

Ministrja vlerësoi veçanërisht maturantët e Qarkut të Tiranës të cilët, në drejtim të investimeve, nuk e kanë pasur të thjeshtë rrugën e tyre drejt suksesit, por që megjithatë ia kanë dalë .“Rruga drejt suksesit për ju nuk ka qenë e njëjtë me maturantët e tjerë, pasi iu është dashur të përshkoni rrugë më të vështirë në kuptimin e investimit, por falë pasionit, përkushtimit dhe talentit tuaj, jo vetëm që ia keni dalë, por e keni bërë shembullin tuaj të jetë një shembull plot shkëlqim. Si një nënë, si mësuese, si Ministre e Arsimit dhe Sportit, përkulem para jush me gjithë dashurinë e zemrës, për gjithë përkushtimin tuaj ndaj dijes”, tha Lindita Nikolla.